Bombay Tamil Teacher

பொங்கல் வாழ்த்து  வான்மகள் கடைக்கண் திறப்பால் நிலமகள் கொண்ட தணுப்பால் உழவன் செய்த உழைப்பால் கழனி எங்கும் பயிர் வனப்பால்  கதிர்கள் கண்ட மலைப்பால்  தைமகள் வந்தாள் பூரிப்பால் தையல் உள்ளம் உவப்பால் மையல் கொண்ட அன்பால் சுனையாகும் இன்பத் திருப்பால் மனையில்  ஓடும் மகிழ்ச்சிப்பால் சொல்லரும் பொருட் குவிப்பால் நல்லறம் நடக்கட்டும் பேரன்பால் பழையன மறவாப் பண்பால்  பண்பாடு போற்றும் சிறப்பால் தமிழ்ப்பால் கொண்ட விருப்பால் அறத்துப்பால் மீதுள்ள ஈர்ப்பால் பொருட்பால் கிடைத்த மலைப்பால் இன்பத்துப்பால் நடக்கும் உள்ளன்பால் சுவை தரு செங்கரும்பால்  வளை கதிர்  நிறைப்பால் ஆதவன் முகம் சிவப்பால்  ஆவின்பால் நுரைப்பால் புத்தரிசி சுவை  மிகுப்பால் பொங்கும் பொங்கல் புதுப்பானைப்பால்  இணைப்பால் கரம் குவிப்பால் இல்லம் எங்கும் தீம்பால் பொங்கலோ பொங்கல் இசைப்பால் புவியெங்கும் இனிக்கட்டும் தமிழ்ப்பால்! அனைவருக்கும் இனிய  பொங்கல் நல்வாழ்த்துகள்!

தை மகளே வா எழுந்தது கதிரவன் புலர்ந்தது பொழுது மலர்ந்தன கண்கள் தொழுதன கைகள் புதுப்பானை வந்தது புதுப்பால் பெய்து புத்தரிசி இட்டு பொங்கலிட புத்தாடை அணிந்த பூவையவள் வந்துவிட்டாள் குலவையிட்டு வரவேற்க  குடும்பமாய் யாம் வந்தோம் தை மகளே வா ! மையிருட்டு விலக்கி பைய நின்கண் திறந்து வையம் உவப்ப  வாழ்வு வளம்பெற தை மகளே வா! தரணி செழித்திட வளங்களை அள்ளித் தா!